23 November 2009

Tuno Uwe Cilembu (Ubi Madu Cilembu)



Tite teti Lewotana biasa tekan uwe. Uwe kayo, uwe hura, uwe wohi, masam-masam. Memang tite mula tahan bisa hala, wai take, ro uwe aya-aya. Jawa alawen biasa rekan uwe hala, kecuali lau Wonosari, Jogjakarta.

Jawa nepe tahan lewun. Tun tou ra mula tahan moan telo. Wai nahan ayaken, irigasi raen mela-mela. Tite pakan uran... bisa hala. Hehehe...

Wia leron go kala Jalan Raya Taman, Sidoarjo, hope uwe wohi. Naranen UBI MADU CILEMBU. Cilembu nepe lewo tou lali Jawa Barat, Kabupaten Sumedang. Wohi onen kuman, kemi-kemi heloka wane. "Uwe nepi pi Jawa Timur morip hala. Te Jawa Barat di Cilembu hena," amak pedagang maring go nepa.

"Oroka?"

"Pediken. Mo persaya hala, mo soba mula uwe nepi te Sidoarjo. Morip memang moripa ra uwe naen take."

Kilo tou ribu buto, ribu hiwa. "Go hope ribu pulo!" go maring.

Amak nepe mupul uwe be tunon. Nah, ra tuno uwe rang oven. Tuno rang kayo hala. Tite tao uwe te oven onen, pakan jam rua telo... tahaka. Hmm... wauken nang iluke tetil-tetil. Hehehe....

Go kong reuk pia kantor mekan UBI CILEMBU, go peten uwe teti lewo. Uwe titen di mela-mela, kemi, tang tula kolak, senelong di sare. Mungkin pemerentah bisa bantu ina ama rae lewo mula uwe varitas kelemuren, senaren, tang dum te kota.

Cilembu nepe lewo kutulen! Ra bisa, tite bisa hala?

No comments:

Post a Comment