04 May 2009

Denan Motong Lolon (Merungge)



Wia rema (3 April 2009) go tei te oringen kutulen, Trawas, Mojokerto. Nepi oring Mbok Jono naen, Desa Seloliman, dahe nong ile. Naranen Gunung Penanggungan.

Oring Mbok Jono naen nepe dahe nong Candi Jolotundo, objek wisata terkenal. Wai nahan naen mela-mela, lae-lae. Leron wekekae ata ana ayaken irena tepi. Jawa alawen tula gudung tepi. Hindu alawen di sembeang, tula gudung, gute wai tepi. Ra maring meri wai Jolotundo nepi TIRTA SUCI.

Leteng-leteng, 23-35 derajat Celcius. Situs-situs Kerajaaan Majapahit aya-aya te Mojokerto. Candi, petilasan, ra tula gudung raen. Go pe anggap Mbok Jono heloka inak nimun. Na sare-sare nong go.

"Ina, mo dengan motong lolon ki. Go lela-lela kae kan motong hala," go maring Mbok Jono. Tepi Jolotundo motong ayaken ro ra biasa rekan hala. Motong pe ra maring KELOR. "Dunia tidak selebar daun kelor".

Go basa novel Pramoedya Ananta Tour, LARASATI, pakan Mbok Jono denan motong. Mas Pur, Mas Faisal, Mbak Maryam... ra koda kiring aya-aya. Tutu pemilu, kerajaan-kerajaan nolungen, ramalan Joyoboyo... macam-macam.

Go henger hena. Mas Pur koda paling semangat, na nepi nolo santri, ana mengaji. Leron weke kae teika te mesikit. Nolo..! Pi na suka geler teti kiwan, ireka non aho, naranen BOY. Ana watanen suka aho?

"Aho nepe Tuhan Allah tula, makhluk Tuhan. Tite musti hormat, piara, nero ana makan," na maring nepa. Hehehe...

Motong di tahaka. Mbok Jono adok go buay, leron tukan. "Nakenan take, ikan take, tahu hena," Mbok Jono maring.

"Tempe ega le take?"

"Tempe gohuka. Sidoarjo alawen rekano kae."

"Ako-ko hala. Tekan tahu hena di jadi."

Mak nyussss! Wulung motong nepi mela-mela. Go kan aya-aya. Wata gohuka, go taling balik, taling motong muti. "Buay mang bohu-bohe," Mbok Jono adok go. Hehehe... Mo maring hala di go taling muri.

Motong (melayu lewon meri MERUNGGE) nepe aya-aya te Jawa. Go koi motong teti Surabaya, Sidoarjo, Malang. Ro ra rekan hala. Puken aku? "Motong nepe wulun ata maten raen?" Pak Bambang, pegawai negeri pe Sidoarjo, maring go.

"Kok bisa?"

Adat nolungen pi Jawa, motong lolon nepe ra tao te ata belaran yang ilmu raen aya-aya. Titen meri ata molan. Ra nepe hing mata, belara, ro susah mata. Ilmu raen aya ayaka. "Kalo tite paluk tang motong lolon, ilmu raen weteka. Ata belaran nepe terus mataya," Pak Bambang maring.

Ooohhh, pantas!

7 comments:

  1. Motong lolon nepe kalo lebung no watanengen lebih mak nyussss om....!!!

    ReplyDelete
  2. Hehehe... pediken. Motong nong wata nengen. Sayang sekali, seba wata negen pi susah tudak ayaka. Kebarek muringen onena gae wata hala. SALAM>

    ReplyDelete
  3. motong lolong nepe temi Manila jadi rebutan ..ro mari..obat mujarap ...ldepan rumah kami ada pohon merungge, nangka, lemon ...sama reti Kalikasa..
    kalo go balik lewu pasti selalu bawa ole-ole jagung titi untuk romo-romo dan suster-suster di sini...pasti mereka melonjak kegirangan...he ama nepa kalo tite lela-lela tey temi doan lali lewu titen
    franskupangujan

    ReplyDelete
  4. Haaaa...moton lolon
    Nene goen suka jaha moton lolon...nae marin goe di negri orang kurasa senang tapi lebih senang di tanah sendiri karna ada moton lolon...legulon moton leron moton nokon di moton...kalo nae gan moton hala..leik limak naen kemuk lelen..haaaa..Terima kasih aja jaha No....

    ReplyDelete
  5. Ama Tukan, terima kasih aya2 mo longet lango goen. Salam buat teman2 lau Bali.

    ReplyDelete
  6. Di kupang, klow sayur kangkung namanya "sayur sarjana", maka motong lolong adalah "sayur romantis" karena kita2 jadi ingat kampung halaman hehehe.
    Motong lolong banyak zat besi, jadi hati2 saja sama yang suka motong lolong!!!!Keras seperti besi!!!

    ReplyDelete
  7. Ama mo ake ma munghero.,,, motong ata mete rekan baru mo tutu mang aya aya.

    ReplyDelete