29 March 2009

Is dawal ana amalake

Wia, go arik Is SMS go. Na nato koda nang lohumen: "Go beng dawal anak amalake. Mo tolong nato doit uhe."

Hehehe... Is, ana tuho wutun nepi, leta doit terus. Na han Jois, Lewotolok alawen, kame lewo dahe. Is jaga lango teti Lewo, gewayan amak pe rae lewo tobo.

Go amak naranen Nikolaus Nuho Hurek, nolo guru teti Mawa, Ile Ape, Lembata. Pensiun, balika nang Bungamuda, lewo daheken. Go inak, Maria Yuliana Manuk, mataya kae 1998. Mama belara te onen, mai te ata molan, metero mang Rumah Sakit WZ Johanes Kupang, ro dokter bisa hala.

Kame metero balik lewo, mataya hulem-holem te Ohe, amak Guru Thomas Terong Hurek langun. Guru Thomas di mataya kae.

Go ana beruin, arik inawae telo: Yus (Vincentia Siri), Ernie (Ernestina Siba), Is (Kristofora Tuto).

Yus teika Kupang, guru te Kupang, nong han anaken. Ernie nong hang Hadakewa lewun. Is jaga lango teti lewo. Nolo Is nepi sekolah te SMAN 1 Kupang, kuliah esi, ro balika lewo nai.

"Go kai wayan Bapa teti lewo. Bapa mehaka hena, lango belen titen amuken," Is marin.

Terima kasih Is, jasa moen go lupang hala!

Is nepi anaken telo. Ana beruin, Maria Yuliana (Yuli), mataya. Matan belara, operasi pi Rumah Sakit dr Soetomo Surabaya. Na, inan, aman, sempat tei nong go pi Surabaya. Rema, leron, kame jagaro te rumah sakit.

Belara naen memang aneh. Dokter maring meri retinoblastoma, mata kucing. Kusing matan. "Penyakit nepi satu di antara seribu," dokter marin.

Tuhan Allah e, puken aku ti mo pile Yuli, ana nuren nepi?

Balik teti lewo, wulan to, Yuli mataya. Mo maiko molo, ina! Resquescat in pace!

Tuhan Allah denga doa kamen. Na gate Yuli, Is nong anaken muri (berewae). Minggu waiken, 19 Maret 2009, anaken tou muri: amalake.
Terima kasih aya-aya.

2 comments:

  1. Puji Tuhan,Ina Is dawala bali,waktu go balik lewo go sempat kai lali waowala te lango Ina Is naen kerung no na han (Jois) nong ana Yuli (alm), go lau kalimantan moan hae Ina Is telpon,moan hae go telpon,tapi sekarang go telpon wati karena go te Bogor mete sekolah paera mungkin hari senin beng go balik .Selamat mudah-mudahan sehat sekeluarga.
    Ama wahon.(antonius7860@yahoo.co.id)

    ReplyDelete
  2. Terima kasih Ama Wahon. mo basa tulisan goen nepi. Salam untuk semua di Kalimantan. Kerja mang sare-sare.

    ReplyDelete